اولا اعرفكم بالعائلة الكريمة اللي معاكم الآن..
أبو عزيز : الأب طبعا متقاعد ويقضي وقته بسوق الخضار..!
أم عزيز : ربة بيت ماتعرف القرآة والكتابة كل مابغوا عيالها منها شيء قالوا عشان الدراسة وتصدق على نيتها .......
عزيز : الابن الأكبر بكالوريوس دوران بالشوراع لين الفجر يقول يدورعلى نفسه ضايع الضعيف اجل من اللي معه !
الدحمي: ما قبلته ولا جامعه النسبة ما تأهل ولا بواسطة ، فما لقى غير يكون صحفي، وطموحه يفتح مجلة شعر شعبي يقول تدخل دراهم واجد...!
نوير: من كبر النظارات اللي لابستها، تقول قارية كل مكاتب المملكة فيلسوفة ماشاء الله عليها ،علم نفس الله يحفظها بس اي احد عنده مشكلة على طول يروح يستشيرها (حتى انا بروح بس مدري متى..!)
نويصر : ثالث ثانوي دايم يسقط ويتمنى يسافر الخارج يدرس طب ( هذا وجهي ان سافرت ..!) يحب الانترنت وعيونه بتلحق نوير جهزو النظارات بس مو كبر نظارات نوير...!
سوير : سوزي مب سوير الشعر اصفر والعيون كل يوم لون ،طبعا آخر العنقود واشطر من نويصر أدب انجليزي من قدها، ولا يفوتك الحكي دايم مزعجة نويصر كل ماجلسوا على الغداء تعلمة الاتيكيت بس نويصر مايخليها كل مازادت حكي ماخلاها تستخدم النت ،ولا نوير مسكينة صار فيها فقر دم كله من سوير ورجيمها تبي الكل رشيق مثلها...!
هاذي عائلة ابو عزيز خلينا نقرب منهم ونشوفهم...
\
l
\
l
\
أذن الفجر وقام بو عزيز للصلاة نسمع بو عزيز
لا اله الا الله اصبحنا واصبح الملك لله
ويدخل بوعزيز على عزيز يصحية للصلاة
عزيز عزيز وانا ابوك قم للصلاة
عزيز: يا حول من ذا الشايب توني نايم راسي منتهي من الدوران شسوي فيه
بوعزيز : عزيز وانا ابوك الصلاة قم الحقنا للمسجد
عزيز : انشاء الله يبه ويقوم عزيز وينزل تحت السرير عشان ابوة يحسبه قام
ويمر بو عزيز المسكين
بو عزيز : ماشاء الله الله هاده سبقنا للصلاة
ويروح بو عزيز لنويصر والدحمي
نويصر سهران على النت والدحمي نايم سمع نويصر صوت ابوه ومايدري وش يسوي....! قطع اسلاك الكمبيوتر بسرعة، ونط على السرير وسوى نفسه نايم
ويدخل بو عزيز
لا اله الا الله نويصر الدحمي الصلاة الصلاة قوموا قم يانويصر قم يالدحمي اطردو الشيطان قولوا لا اله الا الله ....
الدحمي ونويصر : انشاء الله يبه
يقوم نويصر ويرجع الدحمي ينام
نويصر : قم يالدحمي الصلاة
الدحمي : ضف وجهك واذا اقام المسجد قومني
نويصر: جاء ابوي يالدحمي
ويقمز الدحمي تقول مقروص ونويصر يضحك عليه
نويصر : اثرك خواف
الدحمي : مو خوف هذا احترام
نويصر : احلى ياحترام جديدة كني سمعتها في مسلسل، كلمة مسروقه قل غيرهاالمهم اجهز بسرعه خل نلحق الصلاة....
وفي المسجد وبعد مانتهت الصلاة ....!
بو عزيز : وين عزيز ماصلى معنا انا مالقيته بسريرة قلت سبقنا
نويصر : ومن متى عزيز يصلي
بو عزيز : الله يهديكم جميعا
وفي البيت ام عزيز جهزت القهوة والتميرة والفطور ويدخلون العيال
السلام عليكم
ام عزيز : وعليكم السلام هاه بوعزيز قهوه
بوعزيو : عطينا القهوة ماشاء الله وين البنات
ام عزيز : الحين ينزلون
ويجون البنات
صباح الخير يبه
صباخ الخير يمه
بوعزيز : هلا بنوير نور البيت
وهلا بسوير سور البيت
نويصر: طبعا يحق لهم دلع وكلام حلو بنات
سوير: ياربيه نويصر مايفوت عليك شيء الا لازم تفتح فمك
Silent تعلم الصمت
نويصر : ياشيخة بتعلمين انك تعرفين انجليزي
سوير : يبه ابتأخر اليوم بالجامعه لا تجيني بدري
بو عزيز: متى ماخلصتي يابنيتي اتصلي علي
وانتي يانوير متى بتطلعين
نوير: اكلمك يبه اذا ماعندي مناوبه
بو عزيز: على بركة الله مشينا
وفي السيارة
نويصر: البنات يرجعون ورا تسمعون ورا
سوير: مافي داعي تعلي صوتك سمعنا يبه ودني انا اول
بو عزيز : وانا كم سوير عندي
نويصر: يبه راعي مشاعري انا والدحمي حرام ترانا مو جدران احنا اوادم شف لنا قلب واحساس ونشوف، يبه نصيحة لا تهملنا كثير ولا راح تكون العواقب وخيمة، وانا نصحتك اللهّم بلغت، اذا صار شيء لاتقول ياليت تراها ماتعمر بيت..!
نوير : الله يرج ابليسك يانويصر مسوي فيها ضعيف تبي تحزنا عليك فيلم هندي على الصبح..!
سوير : والله بغيت اصيح خلاص نويصر اوعدك ادلعك بدال ابوي ومستعدة افضي نفسي بس عشانك...!
الدحمي: نويصر هذا اكبر ممثل لا يلعب عليكم خذ كل الحنان اللي فيني ماتشوفوني ماعد اكتب قصايد سرق احاسيسي انتبهوا لا يخلص عليكم انا ليش مافكرت ارفع عليه دعوة ( مصدق فيه حقوق...! )
وصلوا بحمدالله سوير الجامعه ونوير المدرسه ونويصر المدرسه والدحمي الجريدة
سوير في الجامعة
دخلت سوير وعلى طول اقرب مرايه ضبطت نفسها وتكشخت تقول رايحة عزيمة مب جامعه المهم شافت خويتها هند
سوير: هلا هنودة اخبارك
هند: هلا سوسو وينك امس
سوير : معليش طلعت بدري تعرفين كنت معزومة عند وحدة من البنات (يلعن التلفيق..!)
هند: ياشيخة فقدناك، طيب اليوم
سوير: لا اليوم انشاء الله تأخير مع البنات تعرفين اليوم الاربعاء
هند : اقول سوسو ساعتك مرة حلوة شكلها غاليه..!
سوير : اي والله بس ما ادري كم سعرها هاذي هدية من وحدة من معجباتي أرسلتها لي يوم ميلادي ( اصلا ماتفرق بعيد الميلاد والحب ...!)
هند: اها اوكي سوسو ماعندك محاظرة الحين..
سوير : الا وبعدها بروح للشله ...
هند : اوكي حبيبتي بالبريك اشوفك باي ...
راحت سوير المحاظرة لكنها وقفت وغيرت طريقها وراحت للشله، تتوقعون ليش ..!
الله يهديك ياسوير أشغلتيهم يفكرون ليه مارحتي للمحاظرة ...؟
اهلا وسهلا بك عزيزي الزائر ..
.:. الادارة .:. 
موضوع: عائلة أبو عزيز 
الجمعة فبراير 29, 2008 1:26 pm
